<<點解人要返工？>>
每日日以繼夜，夜以繼日咁聽到香港人四出買口罩，然後每日聽衛生署同埋啲政府膠官update 確診同感染嘅個案不停上升，又死都唔封關。未感染武漢肺炎之前，可能已經感染咗居住香港無定向長期低落間歇性好想死失調症，簡稱精神病。 今日轉一轉個話題，講一講fresh grad朋友最近搵緊工嘅經歷。
可能大家出嚟做嘢做得耐，不如大家嘗試下代入 ….
假設你係2019年嘅大學畢業生，你想像下，由2019年嘅2,3月開始搵工，不停搵工，面試。私人公司由2019年q2開始，放風聲出嚟話零售市道好差，會freeze headcount, 同時恐嚇打工仔冇bonus, cut人手，裁員。 你係一個fresh grad, 基本上喺jobsbb搵到嘅所有 available vacancy, 全部都係一啲中伏嘅工，個啲請咗一年仲出現嘅工，個啲明明你合乎哂qualifications 又唔叫你interview 嘅工。
就算你將個expected salary, 好似香港信貸評級咁一路下調，依然係搵唔到工。
一直無了期咁，一路等等等等等等，等到2019年年尾，又因為武漢肺炎，本身約你去interview嘅公司，一改再改interview嘅時間，兜口兜面interview 改成phone interview, phone interview 又再inform 你公司因為最近情況，暫停 recruitment, 叫你等消息。
你作為一個年青人，由2019年年頭，又要做文宣，出街抗爭遊行，食催淚彈，驚畀人拉，有案底同 應付官司，搵工面試比人拒絕，再遇上武漢肺炎。你設身處地咁樣想像下以上嘅經歷，有冇打冷震？
咁可能你會話，人人都又抗爭又抗疫，你而家仲緊張一個年青人有冇工做？世界咁亂，大家一齊罷工啦。 罷工呢兩個字，對於失業嘅年青人嚟講，係一個好大嘅諷刺，你要先有一份工，先至有資格罷工。
當一個口罩，賣到幾十蚊一個嘅時候，一個失業嘅青年人，除咗要解決三餐同埋學貸，仲要揾錢買口罩。係咪好灰呢？
點解今日要講一fresh grad 搵唔到工嘅實況？我其實係想講下一個人點解要工作？
我諗好多人每日起身，都問點解要返工？我睇過好多有關點解要返工嘅答案？好想同大家分享以下呢個，我覺得佢係最能夠詮釋點解大家要返工？
佢話人類係群體動物，點解我哋需要返工同勞動？ 就係因為我哋要互相作出貢獻，互相幫忙，先可以存活。你無啦啦點可以喺人哋手中得到協助？你首先就要有貢獻，協助別人先。當然有啲人話：我係獨家村嚟嘅， 我唔需要任何人嘅協助都可以生存。 唔好戇鳩啦，你生活所有嘅必需品，都需要人哋協助同contribute 出來，包括水，電，食物。
咁既然講到每個人都必定需要一份工，成個人類族群先可以sustain, 咁有乜嘢情況，你係應該唔做嘢，或者罷工呢 ?
喺人類需要大家協助，先至可以共存呢個原則之下，醫護人員係應該罷工 …
而家一班醫護人員單方面不停被要求做做做，單方便透支， 做死呢班人，呢個互相協助嘅原則就會崩壞，大家就存活唔到。
非常時期，保護自己，免受感染，唔好添加麻煩俾醫護。
同時抗疫成功之後，支援下個班揾唔到工嘅小朋友，唔好俾you help me, i help you 呢個循環崩壞。
Search